[H]eynricus dei gratia Romanorum imperator augustus Aymoni comiti Geneuę gratiam suam et dilectionem. Quoniam locus Romani Monasterii in nostra tuitione manet, volumus et precipimus tibi per fidem, quam nobis debes, ut ipsum monasterium in omnibus studeas defendere et contra omnes sibi adversantes protector et auxiliator esse; contra Eblonem, qui ab antiquis possessionibus ipsum monasterium vult deicere et iudicium, quod a te et ceteris prudentibus viris in curia episcopi Lausonensis factum est de hominibus ipsius loci, vult respuere, pro nostra fide et amore ipsum locum studeas defendere et iuditium factum omnimodis tenere.
